Turqia kërcënon Izraelin: Po kryeni krime në Gazë, do ju dërgojmë në Hagë
Turqia ka kërcënuar Izraelin se do ta dërgojë në gjykatat ndërkombëtare pasi po përdor si bazë ushtarake spitalin e vetëm të specializuar të kancerit në Gazë.
Ankaraja dënoi gjithashtu ushtrinë izraelite për sulmin e përsëritur ndaj Spitalit të Miqësisë Turko-Palestineze, një strukturë në jug të qytetit të Gazës, e ndërtuar dhe pajisur nga Turqia.
“Fotografia në shtypin palestinez që tregon një grup ushtarësh izraelitë përpara Spitalit të Miqësisë Turko-Palestineze në Gaza është dëshmi e mëtejshme e shkeljes së ligjit ndërkombëtar nga Izraeli dhe ligjit ndërkombëtar humanitar”, tha Ministria e Punëve të Jashtme të Turqisë në një deklaratë.
Ministria theksoi se spitali ishte “qendër e vetme” që ofron kujdes mjekësor për pacientët me kancer në enklavë.
“Dëmi i shkaktuar në spital nga forcat izraelite dhe përdorimi i tij si bazë ushtarake është pjesë e politikës sistematike të Izraelit që synon asgjësimin e popullit palestinez”, tha ministria.
Ministria shtoi se do të siguronte që “përgjegjësit” të sillen para drejtësisë në gjykatat ndërkombëtare.
Spitali i Miqësisë Turko-Palestineze u ndërtua në vitin 2017 nga Agjencia Turke e Korporatës dhe Koordinimit, e cila drejtohej nga Ministria palestineze e Shëndetësisë. Ai konsiderohej si një nga spitalet më të mëdha në Rripin e Gazës.
Në tetor, gjatë fillimit të ofensivës ushtarake të Izraelit, avionët luftarakë izraelitë goditën objektin mjekësor të paktën dy herë, duke i lënë pacientët në një “gjendje paniku”.
Në nëntor, spitali u detyrua të mbyllej për shkak të mungesës së karburantit pas një rrethimi total të vendosur nga Izraeli.
Turqia ka marrë një numër pacientësh palestinezë me kancer nga Gaza për trajtim nga spitali i Miqësisë Turko-Palestineze, pasi spitali nuk mund të funksiononte më.
Gjatë gjithë luftës në Gaza, Turqia ka dënuar shpesh veprimet e Izraelit në Rrip, me Presidentin Rexhep Tajip Erdogan që e quajti Izraelin një “shtet terrorist” dhe bëri thirrje që kryeministri Benjamin Netanyahu “të gjykohej si kriminel lufte”.
Në përgjigje të sulmit në Gazë, Turqia ndaloi të gjitha eksportet drejt Izraelit në maj, me Tel Avivin që i dha fund të gjithë tregtisë së lirë me Ankaranë në një lëvizje hakmarrëse menjëherë më pas.
