“Ukraina” dhe rritja e sigurisë për Evropën, liderët e BE-së mblidhen sot në Bruksel

Liderët e Bashkimit Evropian do të mblidhen sot në mesditë në Bruksel për të diskutuar mbi vijimin e mbështetjes për Ukrainën dhe rritjen e sigurisë në mbrojtjen e Evropës.

Ashtu siç e theksoi presidenti i Këshillit Evropian Antonio Costa më 23 shkurt se “po jetojmë një moment përcaktues për Ukrainën dhe sigurinë evropiane’, të njëjtin qëndrim ka mbajtur edhe një ditë më parë presidenti francez Emanuel Macron, në fjalimin e tij drejtuar kombit. 

Në këtë takim do të jetë i pranishëm edhe presidenti i Ukrainës, Volodymyr Zelensky, i cili vjen pas tensioneve që pati në Shtëpinë e Bardhë me presidentin amerikan Donald Trump dhe reagimin e tij të fundit se Ukraina është gati të ulet në bisedime në mënyrë që t’i jepet fund luftës me Rusinë dhe se po përgatitet për nënshkrimin e marrëveshjes për mineralet e rralla me SHBA-në.

Gjithashtu, Zelensky ka planifikuar të takohet me Sekretarin e Përgjithshëm të Aleancës së Atlantikut të Veriut, Mark Rutte, kancelarin austriak dhe udhëheqjen belge gjatë vizitës së tij në Bruksel.

Udhëheqësit e BE-së do të diskutojnë sot se si Unioni mund të mbështesë më tej Ukrainën dhe parimet që duhet të respektohen në të ardhmen.

“Në këtë kontekst, ata do të shkëmbejnë mendime mbi kontributet evropiane për garancitë e nevojshme të sigurisë që kërkohen për të garantuar një paqe të qëndrueshme në Ukrainë. BE-ja dhe vendet e saj anëtare janë të gatshme të marrin më shumë përgjegjësi për sigurinë evropiane”, theksohet në njoftimin e Këshillit Evropian rreth takimit të sotëm.

Që nga fillimi i agresionit ushtarak të Rusisë, BE-ja dhe shtetet e saj anëtare kanë dhënë gati 135 miliardë euro në mbështetje për Ukrainën dhe popullin e saj, duke përfshirë 48.7 miliardë euro për të mbështetur forcat e armatosura të Ukrainës.

BE-ja ka miratuar gjithashtu sanksione të paprecedentë kundër Rusisë: sanksionet e fundit, të miratuara më 24 shkurt 2025, synojnë fusha vitale të ekonomisë ruse, duke përfshirë bankat, flotën hije të Putinit, mallrat dhe teknologjitë në sektorët industrialë dhe energjetikë.

Në mbledhjen e 3 shkurtit, liderët e Bashkimit Evropian diskutuan se si të forcohet mbrojtja evropiane për sa i përket aftësive kolektive, financimit dhe partneriteteve strategjike.

“Duke u bazuar në atë diskutim dhe në funksion të urgjencës së situatës në Ukrainë, udhëheqësit do të synojnë të marrin vendimet e para për të ndihmuar Evropën të bëhet më sovrane, e aftë dhe më e pajisur për t’u marrë me sfidat e tanishme dhe të ardhshme të sigurisë.

BE-ja dhe vendet e saj anëtare janë të përkushtuara për të shpenzuar më shumë së bashku në fushën e mbrojtjes dhe tashmë kanë ndërmarrë veprime vendimtare në këtë drejtim.

Midis 2021 dhe 2024, shpenzimet totale të mbrojtjes të vendeve anëtare u rritën me më shumë se 30%, duke arritur në rreth 326 miliardë euro, që është afërsisht 1.9% e PBB-së së BE-së”, theksohet më tej në njoftim.