Ura e Bardhajve – Banorët kërkojnë ndërhyrje dhe zgjerim të saj

Banorët e njësisë administrative Rrethina edhe këtë fillim vit kërkesë ndaj pushtetit vendor e qendror kanë ndërhyrjen në urë si dhe zgjerimin e saj.

Ura në të gjithë gjatësinë e saj ka pësuar dëmtime të shumta.

E sikur të mos mjaftojnë këto, zgjerimi i saj është një tjetër nevojë emergjente.

Banorët thonë se nuk kanë munguar as incidentet, ku drejtuesit e automjeteve debatojnë se kush duhet të kalojë i pari mbi urë.

Amortizimi që ura ka pësuar ndër vite, por edhe ngushtësia që ajo ka, janë kthyer në një problem për mijëra banorë të njësisë administrative Rrethina, të cilët përmes kësaj ure lidhen me qytetin e Shkodrës.

 Ura e Bardhajve ështe e një rëndësie të veçantë, pasi lidh 3 fshatra me qytetin e Shkodrës.

Qarkullimi mbi këtë urë është i lartë dhe drejtuesve të mjeteve u duhet të presin, pasi ura është vetëm një kalimshe.

Krahas zgjerimit të saj, forcimi dhe sistemimi i bazamentit dhe këmbëve mbetet një nevojë emergjente nga ana e institucioneve.