Periudha nga maji deri në korrik është, periudha më e mirë për shumimin e peshqve në liqenit e vendit duke filluar që nga krapi, gjuhca etj. Kjo periudhë përkon dhe me lëshimin e vezëve nga ana e peshqve.

Me qëllim shumimin e liqeneve me peshq që rriten në kushte liqenore, ministrja e Bujqësisë, Anila Denaj urdhëroi të premten ndalimin e peshkimit me çfarëdolloj mjeti dhe metode gjuetie në liqenet e Prespës, Ohrit, Fierzës, Ulzës dhe Shkopetit.

Urdhri ka hyrë në fuqi menjëherë dhe parashikon ndalimin e peshkimit dhe grumbullimin e riprodhuesve të krapit në Liqenin e Ohrit

me çfarëdolloj mjeti dhe metode gjuetie, si dhe mbajtjen në bord, tranzitimin në barkë, zbarkimin të të gjitha llojeve të peshqve në liqenin e Ohrit (me përjashtim të koranit), konkretisht: a) për gjuhcën (cironka), prej 20 prillit deri më 20 korrik 2024;  për krapin prej 20 prillit deri më 20 korrik 2024.

Për periudhën 20.7.2024 deri më 20.8.2024, ministria e Bujqësisë urdhëron ndalimin e peshkimit edhe me rrjeta në fashën breg-liqenore prej 300 miljesh nga bregu.

Vend-bazimi i varkave të peshkimit do të jetë në pikat e caktuara nga OMP Pogradec.

Do të jetë Drejtoria e Shërbimeve të Peshkimit dhe Akuakulturës (DSHPA), që do të koordinojë veprimtarinë organizative, teknike dhe financiare me Qendrën e Prodhimit të Rasateve të Koranit në fshatin Lin të Pogradecit, për gatishmërinë e marrjes së riprodhuesve të krapit

Për periudhën prej 20.4.2024 deri më 31.5.2024 të lejohet peshkimi i riprodhuesve të krapit në përputhje me kapacitetet mbajtëse të Qendrës së Prodhimit të Rasateve të Koranit, në fshatin Lin të Pogradecit.

“Veprimtaria e grumbullimit të riprodhuesve, do të organizohet dhe kryhet nën drejtimin e DSHPA-së në bashkëpunim me OMP Pogradec, duke përcaktuara dhe aktivizuar për këtë qëllim jo më shumë se 20 peshkatarë me përvojë, anëtarë të kësaj OMP-je. Për zbatimin e këtij urdhri, të hartohet një plan i përbashkët operativ veprimi nga Drejtoria e Shërbimeve të Peshkimit dhe Akuakulturës, në koordinim me OMP Pogradec. OMP Pogradec duhet të marrë të gjitha masat për zhvendosjen e objekteve, ku peshqit kanë lëshuar vezët në mënyrë natyrale, në rastet e rënies së nivelit të ujit në liqen.”, thuhet në urdhrin e ministrisë së Bujqësisë.

Ndalimi i peshkimit në liqenet e Fierzës, Shkopetit, Prespës dhe Ulzës

Po të premten ministrja e Bujqësisë, Anila Denaj ka urdhëruar ndalimin e peshkimit me çfarëdolloj mjeti dhe metode gjuetie, si dhe mbajtjen në bord, tranzitimin në barkë, zbarkimin të të gjitha llojeve të peshqve në liqenet e Prespës, Fierzës, Ulzës e Shkopetit.

Konkretisht bëhet fjalë për gjuhcën (cironka) prej 20 prillit deri më 20 korrik 2024; për krapin prej 25 prillit deri më 25 maj 2024.

Për periudhën 25.4.2024 deri më 25.6.2024, ndalohet peshkimi me rrjeta në fashën bregliqenore prej 150 miljesh nga bregu për liqenet e Prespës, Fierzës, Ulzës e Shkopetit.

Vend-bazimi i varkave të peshkimit do të jetë në pikat e caktuara nga OMP-të përkatëse.

Për zbatimin e këtij urdhri, të hartohet një Plan i Përbashkët Operativ Veprimi nga Drejtoria e Shërbimeve të Peshkimit dhe Akuakulturës, në koordinim me OMP-të përkatëse që ushtrojnë aktivitet peshkimi në këto liqene.

“OMP-të të marrin të gjitha masat e zhvendosjes së objekteve, ku peshqit kanë lëshuar vezët, në rastet e rënies së nivelit të ujit në këto liqene.”, theksohet në urdhrin e ministres Denaj.