Vdekja e punëtorit në Shëngjin, i riu punonte në të zezë, 3 persona në kërkim

I riu Emiliano Frroku, i cili humbi jetën mëngjesin e 9 majit teksa po punonte në një pallat në ndërtim në Shëngjin, nuk ishte i siguruar në punë. Nga verifikimet e Inspektoratit Shtetëror të Punës ka rezultuar se viktima , Emiliano Frroku, punonte në të zezë në ndërtimin e dy kateve shtesë të objektit,  të cilat rezultonin se ishin pa leje.

Në momentin e ngjarjes,  i riu po montonte vinçin, i cili u shkëput dhe ra nga kati 9-të  i pallatit  e për pasoje gjeti vdekjen e menjëhershme 28-vjeçari Emiliano Frroku.

Në lidhje me ngjarjen, policia ka shpallur në kërkim 3 persona dhe një  tjetër është proceduar penalisht në gjendje të lirë. 

Ata janë : Leon Ndoci 51vjeç,  administrator i firmës për ndërtimin e pallatit, Martin Biba 51 vjeç banues në Tiranë, sipërmarrës i punimeve, Loren Haxhia 32 vjeç banues në Tiranë, drejtues teknik i firmës së ndërtimit.

Ndaj tyre janë ngritur akuzat “Shkelja e Rregullave të Sigurisë në Punë” dhe “Ndërtim pa leje”, ndërsa po verifikohen dhe veprimet e Inspektoriatit Vendor të Mbrojtjes së Territorit në Bashkinë Lezhë si dhe insitucioneve të tjera përgjegjëse, siç është dhe Policia e Shtetit të cilët kanë lejuar ndërtimin pa leje.

Më tej, në vijim të veprimeve procedurale për rastin u referuan materialet në Prokurori, ku nisi procedimi në gjendje të lirë, për veprat penale “Ndërtimi i paligjshëm” dhe “Punësimi i paligjshëm”, për shtetasin H. H., 44 vjeç, banues në Lezhë, punëtor i firmës së ndërtimit.

Nga hetimet dyshohet se këta shtetas i kryenin ndërtimet në pallat, të papajisur me dokumentacionin e duhur.