Vdekja tragjike e futbollistit ganez, Duamena/ Gazetari i Sportit në RTSH: Ishte një fund i paralajmëruar
Altin Kodra
Gazetari i Sportit në Radio Televizionin Shqiptar, Altin Kodra ka deklaruar në emisionin “Jetë Shqiptare” në RTSH 1 se vdekja tragjike e sulmuesi të Egnatias, Rafael Duamenas ishte një fund i paralajmëruar.
“Ai ishte relativisht i ri, ishte 28 vjeç, por pas gjithçkaje që ka dalë tashmë, ishte fatkeqësisht një fund i paralajmëruar. Në rastin më të mirë unë e kam thënë edhe më herë këtu në RTSH, në kuptimin popullor që “ai ishte i keqi i vetes” përtej faktit që ishte një djalë dhe një njeri shumë i mirë”, u shpreh Kodra.
Gazetari Kodra theksoi se historia e tij lidhur me problemet e zemrës njihej edhe më parë, pasi kishte pasur probleme më parë në Austri dhe në stërvitjen e kombëtares së Ganës, ku mjeku i kësaj skuadre i kishte thënë prerë se nuk mund të luante më futboll.
“Ka pasur atak në 2017 në fushë në kupën e Austrisë, në 2021-n ka pasur edhe në stërvitjen e Ganës. I është thënë edhe nga mjeku i Ganës se duhet ta linte futbollin dhe e treta është kjo. Thuhet që luante me debrifilator në Shqipëri por ka ardhur pa debrifilator”, u shpreh ai.
Rafael Duamena humbi ndjenjat gjatë ndeshjes me Partizanin dhe u dërgua menjëherë në spital, por pavarësisht ndihmës futbollisti nuk arriti që të mbijetonte duke ndërruar jetë në moshën 28-vjeçare.
Pjesë nga diskutimi në studio:
Gazetari Altin Kodra: Ai ishte relativisht i ri, ishte 28 vjeç, por pas gjithçkaje që ka dalë tashmë, ishte fatkeqësisht një fund i paralajmëruar. Në rastin më të mirë unë e kam thënë edhe më herë këtu në RTSH, në kuptimin popullor që “ai ishte i keqi i vetes” përtej faktit që ishte një djalë dhe një njeri shumë i mirë.
Duraku, kardiologe: Na tremb dhe na tmerron pjesa e të mospasurit kujdes paraprak në mosha kaq të reja. Është e rëndësishme vlerësimi paraprak i sportistëve dhe në mënyrë të vazhdueshme.
Altin Kodra: Ka pasur atak në 2017 në fushë në kupën e Austrisë, në 2021-n ka pasur edhe në stërvitjen e Ganës. I është thënë edhe nga mjeku i Ganës se duhet ta linte futbollin dhe e treta është kjo. Thuhet që luante me debrifilator në Shqipëri por ka ardhur pa debrifilator.
Duraku, kardiologe: Sforcimi fizik, futbolli, sporti ndikojnë për keq tek pacientët që janë me sëmundje kardiake. Për këtë arsye, këtyre pacientëve nuk u lejohet të bëjnë sforcime të mëdha fizike jo vetëm të luajnë. Pra, sigurisht që ai ka pasur mbrojtje deri në momentin që ka pasur debrifilatorin. Ai nuk e kishte më këtë pajisje këtu te ne që mund të kishte qenë jetëshpëtuese.
Z. Kodra, pse e kishte hequr debrifilatorin?
Altin Kodra: Njerëz të tillë nuk duhet të lejohen të luajnë futboll. Në Shqipëri, ligji shqiptar nuk e ndalon të luajnë futboll. Në Itali nuk lejohet të luash. Por është një hiporkrizi e UEFA-s sepse në vende të caktuara lejohet në vende të tjera nuk lejohet.
A duhet ndryshuar kjo ?
Altin Kodra: Kur mjekësia thotë që nuk lejohet, nuk lejohet dhe mbyllet diskutimi pastaj. Ai ka ardhur me letra në rregull. Ai e kishte deklaruar publikisht që do të ndaloj kur të më ndalojë Zoti.
