Vdes dirigjenti kontrovers Leif Segerstam, autor i 370 simfonive

Dirigjenti finlandez Leif Segerstam, i cili drejtoi orkestra anembanë botës, shkroi më shumë se 370 simfoni dhe e quajti veten “Jezusi i muzikës”, ka vdekur në moshën 80-vjeçare.

Ai ishte i njohur për drejtimin e tij kapriçioz dhe energjik, dhe flokët dhe mjekra e gjatë të bardhë, që i dhanë atij një pamje të Babadimrit kur udhëzonte muzikantët.

Transmetuesi publik finlandez, YLE njoftoi vdekjen e tij, duke cituar djalin e tij Jan, i cili tha se babai i tij kishte vdekur pas një sëmundjeje të shkurtër.

Leif Segerstam ka dirigjuar orkestra në mbarë botën, përfshirë atë të Çikagos, Filarmoninë e Los Anxhelesit, Simfoninë e Radios së Vjenës, atë të Torontos dhe Orkestrën Filarmonike Mbretërore të Liverpulit.

I lindur në një familje muzikantësh, ky fëmijë i mrekullueshëm mësoi të lexonte në moshën trevjeçare, të deshifronte fletët e muzikës në moshën pesëvjeçare dhe të kompozonte pjesën e tij të parë në moshën gjashtëvjeçare.

“Unë jam pothuajse si Jezusi i muzikës”, tha ai dikur duke shtuar se ”në botën e muzikës, kam të vërteta po aq të çmuara sa mësimet e Jezusit”.