Vendimi historik i Kolorados: Tramp nuk është i përshtatshëm për postin e presidentit

Gjykata e Lartë e Kolorados të martën e shpalli Donald Tramp (Trump) të papërshtatshëm për të mbajtur sërish postin e presidentit amerikan.

Në një vendim historik, gjyqtarët urdhëruan që ai të hiqej nga votimi primar presidencial i shtetit, pasi përcaktuan se ai u përfshi në kryengritje më 6 janar 2021. Vendimi krijon një përballje të mundshme në gjykatën më të lartë të vendit për të zgjidhur nëse sulmi i 6 janarit në Kapitol përbënte një kryengritje dhe nëse përfshirja e Tramp e skualifikon atë nga kandidimi për postin.

Vendimi nga Gjykata e Lartë e Kolorados shënon herën e parë që një kandidat presidencial konsiderohet i pakualifikuar për postin sipas një dispozite të përdorur rrallë që ndalon kryengritësit të mbajnë poste.

“Shumica e gjykatës mendon se Tramp është skualifikuar nga mbajtja e detyrës së presidentit sipas Seksionit 3 të Amendamentit të 14-të”, shkroi në vendimin e saj gjykata, gjyqtarët e së cilës u emëruan të gjithë nga guvernatorët demokratë.

Tramp është zotuar se do të apelojë në gjykatën supreme amerikane.

 “Ne kemi besim të plotë se Gjykata e Lartë e SHBA do të vendosë shpejt në favorin tonë dhe më në fund do t’i japë fund këtyre padive jo-amerikane”, tha Steven Cheung, një zëdhënës i fushatës së Trump.

Vendimi zbatohet vetëm për zgjedhjet paraprake republikane të 5 marsit, por përfundimi i tij ka të ngjarë të ndikojë gjithashtu në statusin e Tramp për zgjedhjet e përgjithshme të 5 nëntorit. Parashikuesit jopartiakë të zgjedhjeve amerikane e shohin Koloradon si demokratike të sigurt, që do të thotë se Xho Bajden (Joe Biden) ka të ngjarë të mbajë shtetin pavarësisht nga fati i Tramp.

Vendimi është një fitore për grupet e avokimit dhe votuesit anti-Tramp, të cilët kanë ngritur disa sfida të ngjashme ligjore ndaj kandidaturës së ish-presidentit sipas seksionit 3 të amendamentit të 14-të, i cili u miratua pas luftës civile amerikane për të mbajtur ish-konfederatat nga kthimi në pushtet.