Vendimi i Kushtetueses/ Berisha: Atentat ndaj Kushtetutës, firmosi vendosjen e monizmit të Ramës në Shqipëri

Një ditë pas heqjes së imunitetit nga Kuvendi, ish-kryeministri Sali Berisha ka reaguar me një postim në rrjetin social Facebook në lidhje me vendimin e Gjykatës Kushtetuese e cila rrëzoi kërkesën e 1/5 së deputetëve të grupimit të tij për të pezulluar procedurat që i hapnin rrugë drejtësisë për marrjen e masave shtrënguese ndaj deputetit.

Ish-kryeministri e ka cilësuar vendimin e Kushtetueses si atentat ndaj Kushtetutës, ndërsa akuzoi Gjykatën si “seksion mjeran të rilindjes së Edi Ramës”.

“Gjykata Kushtetuese në vendimin e saj të datës 20. 12. 2023 për të justifikuar hedhjen poshtë të kërkesës së 1/5 së deputetëve për shqyrtimin e marrjes me urdhër politik nga prokuroria dhe gjykata të kompetencave të Kuvendit që rrjedhin nga neni 73 pika 2 e kushtetutës në rastin e vendosjes së masave të sigurisë pa miratimin e kuvendit ndaj kryetarit të PD, deputetit Sali Berisha, shkruan se “Kushtetuta ka mirëpërcaktuar rastet kur grupeve të deputetëve u janë njohur të drejta si entitete dhe në këtë drejtim, 1/5 e deputetëve dhe Kuvendi janë subjekte kushtetuese të ndryshme, që nuk mund të barazohen me njëri tjetrin”.

Ky pretendim është një trillim i turpshëm dhe i pashembullt pasi sipas nenit 131 të Kushtetutës që përcakton subjektet që vënë në lëvizje Gjykatën Kushtetuese, Kuvendi dhe organet e tij drejtuese nuk janë subjekte që vënë në lëvizje Gjykatën Kushtetuese. Kjo pra është një shpikje, një trillim primitiv dhe i turpshëm. Atentat i vërtetë ndaj Kushtetutës.

Me këtë skandal të paimagjinueshëm që ka bërë dje me urdhër politik Gjykata Kushtetuese ka përdhosur Kushtetutën, jurisprudencën e sotme  të Gjykatës Kushtetuese, e deri tek vet Gjykatën dhe ligjin e saj organik. Ajo nga një mbrojtëse e kushtetutës është shndërruar në një seksion mjeran i Rilindjes së Edi Ramës”, shkruan Berisha.

Ish-kryeministri u shpreh se me vendimin e dhënë, Gjykata Kushtetuese i dha një “kolpo di gracia”  rendit kushtetues të vendit dhe firmosi vendosjen e monizmit të plotë të Edi Ramës në Shqipëri.

“Ky standart i përdorur në vendimin e djeshëm nuk mund të quhet ndryshe veçse më së paku mashtrim, pafytyrësi ligjore me pasoja dramatike per vendin. Si përfundim mund të themi se me vendimin e fundit të saj politik Gjykata Kushtetuese i dha një kolpo di gracia Rendit Kushtetues të vendit dhe firomosi vendosjen e monizmit të plotë të Edi Ramës në Shqipëri. Ajo mbylli vitin 2023 si një seksion juridik i Partisë Socialiste dhe faktoi në mënyrë përfundimtare se reforma në drejtësi e shndërroi këtë sistem në një degë të ekzekutivit të Edi Ramës”, theksoi ai.