Vendkalimi për furnizime i mbyllur/ Blinken: SHBA po punon që ndihma të hyjë në Gaza

Sekretari amerikan i shtetit Entoni (Antony) Blinken ka deklaruar se Shtetet e Bashkuara po punojnë në mënyrë aktive për të siguruar që ndihma humanitare të mund të hyjë në Gaza.

“Ne qëndrojmë me Izraelin ndërsa ai mbron veten. Shtetet e Bashkuara po punojnë gjithashtu në mënyrë aktive për të siguruar që njerëzit e Gazës të mund të dalin nga rreziku dhe ndihma për të cilën ata kanë nevojë – ushqim, ujë, ilaçe – mund të hyjë. Hamasit nuk i intereson nëse palestinezët vuajnë”, shkruan Blinken në një mesazh të shkurtër në “X” , dikur Twitter.

Gaza po përballet me një krizë kritike humanitare, me mungesë të ujit, energjisë elektrike, ushqimit, karburantit dhe ilaçeve. Kalimi Rafah midis Gazës dhe Egjiptit, i vetmi vendkalim i mbetur për furnizime, është mbyllur për pjesën më të madhe të javës së kaluar. Tonelata me furnizime jetike humanitare për njerëzit në Gaza janë grumbulluar në anën egjiptiane të kufirit.

Gjysmë milion banorë janë larguar nga Gaza veriore për në jug, sipas Izraelit, ndërsa ai përgatitet për fazat e ardhshme të luftës së tij . Më shumë se 2,600 njerëz kanë vdekur në sulmet ajrore izraelite gjatë javës së kaluar, tha ministria palestineze e shëndetësisë.

Enklava është një rrip i ngushtë toke, vetëm rreth 25 milje i gjatë dhe shtatë milje i gjerë – pak më shumë se dyfishi i madhësisë së Uashington DC. Në perëndim të tij shtrihet Deti Mesdhe, në veri dhe lindje është Izraeli dhe Egjipti në jug. Është një nga dy territoret palestineze, tjetri është  Bregu Perëndimor më i madh, i pushtuar nga Izraeli, i cili kufizohet me Jordaninë.

Rreth 2 milionë njerëz janë grumbulluar në territorin prej 140 miljesh katrorë. Shumica dërrmuese e njerëzve janë të rinj, me  50% të popullsisë nën moshën 18 vjeç , sipas Organizatës Botërore të Shëndetësisë.

Komisioneri i përgjithshëm i Agjencisë së Kombeve të Bashkuara për Ndihmë dhe Punë, Filip Lazini (Philippe Lazzarini) tha të dielën (15 tetor) se Gazës po i mbaron me shpejtësi uji dhe energjia elektrike dhe popullsia përballet me mungesa të mëdha ushqimi dhe ilaçesh.

“Gaza po mbytet dhe duket se bota tani e ka humbur humanitetin e saj. Nëse shikojmë çështjen e ujit – të gjithë e dimë se uji është jetë – Gazës po i mbaron uji dhe Gazës po i mbaron jeta”, tha Lazarini.