Vetëmbytja e nënës me 3 fëmijët në Bunë, prokuroria kërkon 6 vite burg për bashkëshortin
Prokuroria e Shkodrës kërkon dënimin me 6 vite burgim për Erdgys Arrazin, bashkëshortin e Alma Arrazit, e cila u hodh nga ura mbi lumin e Bunës bashkë me tre fëmijët e mitur. Për shkak të gjykimit të shkurtuar, dënimi për Arrazin do të reduktohet në 4 vite burgim.
Ndaj tij rëndojnë akuzat e “shkaktimit të vetëvrasjes” në dëm të bashkëshortes së tij. Nga hetimet ka rezultuar se i pandehuri e shtyu 39-vjeçaren drejt aktit të vetëflijimit për shkak të sjelljes diskredituese, duke cenuar dinjitetin e saj.
Lidhur me tre fëmijët është regjistruar vrasja për shkak të cilësive të veçanta të viktimës, por për shkak se autorja e dyshuar e krimit, Alma Arrazi ka vdekur, çështja është pushuar.
Ngjarja tragjike ndodhi më 2 maj 2023, kur 39-vjeçarja Arrazi mori vendimin për t’u flijuar bashkë me fëmijët pak minuta pasi ishte ndarë nga kunata e saj.
U deshën disa ditë kërkime nga palombarët për të gjetur në lumë trupat e fëmijëve dhe të nënës. Instituti i Mjekësisë sqaroi se shkak i vdekjes ishte mbytja dhe nuk ishte konstatuar asnjë lloj dhune.
