Vizita e Blinken në Tiranë, AP: Aleat kyç në rajon, diskutime edhe për tensionet Kosovë-Serbi

Vizitës së Sekretarit Amerikan të Shtetit, Antoni Blinken në Tiranë i ka kushtuar një shkrim edhe prestigjiozja amerikane “Associated Press”.

Sipas AP sekretari Blinken viziton Shqipërinë për të riafirmuar marrëdhëniet me një partner kyç në Ballkan dhe një aleat në mbështetjen e luftës në Ukrainë.

“Blinken do të takohet me zyrtarë të lartë dhe do të fokusohet në të ardhmen e Ballkanit Perëndimor pasi Shqipëria dhe disa fqinjë kërkojnë të anëtarësohen në Bashkimin Evropian, sipas zyrtarëve të lartë amerikanë. Uashingtoni ka mbështetur fuqishëm integrimin e Shqipërisë në BE. SHBA ka vlerësuar lidershipin e Shqipërisë në ish-rajonin e shkatërruar nga lufta dhe rolin e saj të fundit në Këshillin e Sigurimit të Kombeve të Bashkuara si një anëtar jo i përhershëm. Shqipëria është anëtare e NATO-s dhe ka caktuar rregullisht njësi të vogla të ushtrisë në misionet paqeruajtëse ndërkombëtare dhe operacionet e NATO-s”, shkruan AP.

Po gjatë shkurtit, Shqipëria do të presë një samit ndërkombëtar për Ukrainën, ku pritet të marrë pjesë edhe presidenti i Ukrainës.

AP shton gjithashtu se pjesë e bisedimeve të Blinken do të jenë edhe tensionet mes fqinjëve Kosovë dhe Serbi. Negociatat e ndërmjetësuara nga BE për të normalizuar marrëdhëniet e tyre kanë pasur progres të ngadaltë, ndërsa incidentet e rastësishme të dhunshme kanë nxitur frikën e destabilitetit. Shtetet e Bashkuara dhe BE kanë shprehur shqetësimin për ndalimin e fundit të Kosovës për dinarin si monedhë në komunat e saj me shumicë serbe.

Blinken gjithashtu do të njohë rolin e Shqipërisë pasi talebanët morën pushtetin në Afganistan në gusht 2021 pasi trupat e SHBA-së dhe NATO-s u tërhoqën nga vendi. Shqipëria ishte e para që strehoi rreth 3200 afganë të arratisur përpara se të zhvendoseshin për vendosjen përfundimtare në Shtetet e Bashkuara. Blinken pritet të takojë disa nga afganët e mbetur ende në Shqipëri.

Pas ditës së tij në kryeqytetin e Tiranës, Blinken shkon në Gjermani për Konferencën e Sigurisë në Mynih.