Vjero: Projektligji për lojërat e fatit, formalizim i basteve sportive online

Në drejtimin e kryetarit Arben Pëllumbi, komisioni për Veprimtaritë Prodhuese, Tregtinë dhe Mjedisin, shqyrtoi dhe miratoi projektligjin “Për disa shtesa dhe ndryshime në ligjin nr. 155/2025 “Për lojërat e fatit në Republikën e Shqipërisë”, të ndryshuar”.

Të ftuar për këtë projektligj ishin Vasilika Vjero, zëvendësministre e Financave dhe Ekonomisë, Zhani Cakuli, drejtor i Përgjithshëm i AMLF-së, si dhe stafi shoqërues.

Gjatë prezantimit të këtij projektligji, zëvendësministrja Vjero u ndal në qëllimin, risitë dhe nevojën e sjelljes së ndryshimeve ligjore, duke thënë se projektligji i është nënshtruar një procesi të gjatë konsultimi me grupet e interesit.

Vjero theksoi se “qëllimi kryesor i këtij projektligji është rikthimi i kategorisë së basteve sportive, por vetëm në formën online, gjë e cila synon formalizmin e tregut të lojërave të fatit për këtë kategori loje, duke licencuar subjekte të cilat kanë eksperiencë në ushtrimin e aktivitetit “baste sportive”, si dhe përdorimin e të ardhurave të mbledhura nga aktiviteti i basteve sportive online në mbështetjen direkte në fushën e sportit, kulturës, inovacionit dhe teknologjisë së inovacionit, etj”.

Po ashtu, ajo shtoi se risi e këtij projektligji janë agjentët financiarë të autorizuar, krijimi i garancive për shlyerjen e detyrimeve periodike ndaj AMLF-së, si dhe bëri me dije mbi kriteret e licencimit.

Relatori i çështjes Laert Duraj, tha se “ky projektligj paraqitet përpara nesh nisur nga një realitet i cili ekziston në Shqipëri”.

Mbledhja vazhdoi me diskutime, komente dhe pyetje të ndryshme, ku më pas anëtarët e komisionit e miratuan këtë projektligj ne parim, nen për nen dhe në tërësi.