Vllaznia kryeson Superligën/ Tre ndeshje, tre fitore, kuqeblutë kryesojnë kampionatin me 9 pikë të plota

Pas Partizanit në transfertë dhe Teutës në shtëpi, ndeshje këto të fituara respektivisht me rezultatet, 0-3 dhe 21-0, Vllaznia e futbollit femra regjistron edhe fitoren e tretë radhazi në kampionatin kombëtar të Superligës. Radhën në javën e tretë e ka pasur Gramshi, të cilin skuadra kuqeblu e drejtuar nga trajneri Nikolin Leka e ka likuiduar duke e mundur në shtëpinë e tij me rezultatin e thellë, 0-6. Vllaznia me autoritetin e kampiones kombëtare në fuqi ka gjetur shumë shpejt rrugën e rrjetës duke shënuar që në minutën e 11-të me të zakonshmen Megi Doci.

Ky gol kaq i shpejtë la të kuptohej se Vllaznia do të vijonte breshërinë e golave sic bëri ndaj Teutës një javë më parë teksa e mundi 21 me 0. Por nuk ndodhi kështu, sepse skuadra vendase u mbrojt mirë në minutat në vazhdim të pjesës së parë duke bërë që kjo pjesë loje të mbyllet me rezultatin 0 me 1 në fitim të Vllaznisë. Golat e tjerë për Vllazninë duket se ishin ruajtur për 45 minutëshin e dytë, kur Vllaznia tund edhe pesë herë të tjera rrjetën e Gramshit.

Presioni i skuadrës kuqeblu në portën vendase sjell tre gola shpejtë njëri pas tjetrit, përkatësisht në minutat, 62, 63, 64. I pari në fakt është autogol i shënuar nga nga gramshiotet me Ballicin për të vijuar më pas me futbollistet kuqeblu Lucie Gjini dhe Klaudia Borci. 0 me 4 për Vllazninë. Por, nuk mbyllet këtu, sepse goleadorja e talentuar e Vllaznisë dhe ekipit kombëtar, Megi Doci nuk mund të largohet nga Gramshi me vetëm një gol.

Kështu që, në vazhdim vijnë edhe dy golat e Docit, përkatësisht në minutat 67-të dhe 78-të duke regjistruar tripletën e saj në këtë ndeshje si dhe rezultatin përfundimtar të krejt takimit me shifrat e thella 0 me 6 në fitim të Vllaznisë. Me këtë fitore, e treta radhazi në kampionat, Vllaznia kryeson kampionatin e Superligës së femrave me 9 pikë të plota.