Vllaznia nis “kthesën” / Fitorja me Dinamon, kuqeblutë ngjiten në vendin e pestë

Fitorja me Dinamon me rezultatin 3 me 1, ndeshje kjo për llogari të javës së 16-të të Abissnet Superiore mund të konsiderohet edhe nisja e kthesës së Vllanzisë. Tre pikëshi i marrë ndaj bluve, e ngjiti Vllazninë në vendin e pestë të klasikikimit, me vetëm një pikë larg Skënderbeut të vendit të katërt, aty ku është edhe objektivi i kuqebluve. Megjithatë, duhet thënë se dueli i luajtur mbrëmjen e së dielës në stadiumin “Loro Boriçi” nuk nisi aspak mirë për Vllazninë, e cila pësoi gol që në minutën e katërt, kur Denison kaloi në avantazh Dinamo Cityn. Por, forca e Vllaznisë qëndroi tek besimi për të përmbysur rezultatin. Fillimisht me Çobën që vendosi barazpeshëm në minutën e 11-të, dhe më pas në të 31-tën me autor Grudën, Vllaznia e mbyll pjesën e parë në avantazh 2 me 1. Ndërkohë, për të mbyllur krejt ndeshjen mendoi kapiteni Bekim Balaj, i cili me golin e shënuar katër minuta nga fillimi i pjesës së dytë thelloi avantazhin e Vllaznisë me rezultatin, 3 me 1, rezultat i cili qëndroi në fuqi deri në fund të takimit.
Sfida e ardhshme, ajo e javës së 17-të e gjen Vllazninë në një transfertë të vështirë, për t’u përballur në kryeqytet me ekipin bardheblu të Tiranës. Përballje kjo që do të jetë edhe një test real për kthesën e vertetë të Vllaznisë.