Vonohen pagesat e BE për vendet e Ballkanit Perëndimor
Gjashtë vendet e Ballkanit Perëndimor, përfshi Shqipërinë ende nuk kanë marrë pagesat e para të paketës europiane të rritjes dhe reformave për rajonin e cila kap shifrën e 6 miliardë eurove.
Sipas Radios Europa e Lirë, vonesa me këto pagesa, që duhet të nisnin që në fund të vitit të shkuar, ka më shumë lidhje me vendet përfituese sesa me gatishmërinë e BE-së për t’i lëvruar ato.
Duket se problemi me disa vende të rajonit, përfshirë edhe Kosovën, është se me BE-në duhet të arrijnë marrëveshje për kredi, pasi një pjesë e mjeteve financiare janë në formë të kredive dhe një pjesë grante pa kthim.
Paketa e përgjithshme për të gjashtë vendet e Ballkanit Perëndimor – Kosovën, Shqipërinë, Maqedoninë e Veriut, Serbinë, Bosnje dhe Hercegovinën dhe Malin e Zi – kap shumën prej 6 miliardë eurosh dhe mbulon periudhën prej vitit 2024 deri më 2027.
Nga kjo shumë, 2 miliardë euro janë grante nga BE-ja pa kthim, ndërsa pjesa tjetër në formën e kredive të favorshme.
Qëllim i kësaj pakete ambicioze financiare të BE-së është që të ndihmohet rritja ekonomike në këtë rajon dhe, në këtë mënyrë, të përshpejtohet edhe procesi i integrimit të tij evropian.
Shqipëria do të përfitojë në total 922 milionë euro, ndërsa si mjete parafinancuese 64.5 milionë.
