Votimi i buxhetit 2024, Çuçi: Nuk do lëmë shqiptarët pa buxhet, më i madhi në histori

Kryetari i grupit parlamentar socialist Bledi Çuçi në një deklaratë për media jashtë Parlamentit, ka komentuar votimin e buxhetit të 2024-ës mes tymueseve, tensioneve e pa votat e opozitës.

Çuçi u shpreh se ndonëse në Kuvend duhet të jepeshin alternativa nga ana e opozitës, kjo e fundit përsëriti skenarë të cilët sipas tij, shqiptarët nuk duan t’i shohin.

Çuçi deklaroi më tej se në buxhetin e 2024-ës është akorduar 400 milionë euro plus për rritjen e pagave, që do të jetë, sipas tij, rritja më e madhe.

“Sot që duhet të diskutonim që ata të jepnin alternativat, sot pamë të njëjtin skenar për fat të keq që besoj unë shqiptarët nuk do duan ta shohin.

Sot e vetmja gjë që duhet t’i mbetet në mendje shqiptarëve, është buxheti i cili ka akorduar dhe sapo miratuam në parim 400 mln euro plus për rritjen e pagave. Rritja më e madhe e rritjes së pagave, ku përfitojnë, mësues, punonjës policie. Paga mesatare vitin tjetër pritet të shkojë 900 euro. Nuk na intereson fare lufta e brendshme  PD-së”, tha Çuçi.

Ky i fundit theksoi se detyra e mazhorancës është t’i japin shqiptarëve buxhetin më të madh në histori, dhe nëse opozita do vijojë me tymuese, PS nuk do i lërë shqiptarët pa buxhet.

“Detyra jonë është të japim shqiptarëve buxhetin më të madh në histori, mbi 7 miliardë euro, dyfishi i 2013-ës.

Ne i kemi diskutuar gjerësisht në Komisione, me të gjithë institucionet e pavarura, me aktorët e interesit. Kështu do vazhdojmë dhe me nen për nen. Nëse ata do vazhdojnë me tymuese, ne nuk do i lëmë shqiptarët pa buxhet. Ne nuk kemi krizë, krizë ka opozita”, shtoi ai.