Xhixho : Buxheti 2024 do t’i zhysë shqiptarët akoma më thellë në krizë!

Partia e Lirisë në opozitë, ka shprehur kritikat saj për projektbuxhetin e viti 2024, duke vlerësuar se ai vetëm rrit taksat dhe shpenzimet për PPP dhe nuk ka planifikuar asnjë paketë sociale për shtresat në nevojë.

Nënkryetarja e kësaj partie Erisa Xhixho, në një dalje për mediat tha se ” maxhoranca ka mbyllur dyert e debatit parlamentar, sepse nuk e do as transparencën, as llogaridhënien e aq më pak demokracinë apo parlamentarizmin”. 

Duke analizuar shifrat e buxhetit 2024 zonja Xhixho tha se rritja e barrës fiskale është karakteristike e këtij buxheti. “Për shkak të dështimit në mbledhjen e të ardhurave, me buxhetin e ri kostoja zhvendoset te qytetarët. Një rritje e taksave në 70 milionë euro parashikohet në buxhetin e vitit 2024” tha ajo duke shtuar se “Kriza e çmimeve është ndier disafish më shumë te shtresat vulnerabël, pensionistët apo studentët, por në buxhetin e PPP-ve dhe klientëve të qeverisë ata janë injoruar tërësisht”.
 
“Në kulmin e krizës së çmimeve, ndihma ekonomike është shkurtuar për 500 familje, ka zero rritje për pagesat e papunësisë dhe zero transparencë për indeksimin e pensioneve. Fondi i sigurimeve shoqërore vijon të mbetet në nivelin qesharak prej 2.1%, ndërsa rritja e parashikuar e pagës krijon diferenca, në vend që të bëhej për të gjithë administratën” tha më tej nënkryetarja e Partisë së Lirisë, Erisa Xhixho.

Sipa saj edhe fondet për Ministrinë e Arsimit nuk janë rritur, por përkundrazi në zërat për arsimin parauniversitar dhe universitar dhe kërkimin shkencor kanë pësuar rënie. “Vetëm 2.29% PPB do jetë buxheti i arsimit që është më i ulti në rajon. Kjo është dramatike për gjendjen e mjerueshme në të cilën ndodhet arsimi sot. Ndërkohë që kjo qeveri premtoi 5% të PPB, që në fakt është minimumi që mund të ketë një buxhet arsimi sipas standardit të BE-së”.

PL shpreh shqetësimin për rritje e shpenzimeve kapitale. “Koncensionet si ai i Rrugës së Arbrit, Porti i Jahteve, Check–up, Sterilizimi, Inceneratori i Tiranës do të vijojnë të financohen nga paratë e shqiptarëve të varfër” tha zonja Xhixho, duke shtuar se “Shpenzimet për koncesionet/PPP me financim buxhetor rriten për gati me 10%, për vitin e ardhshëm ose me 136 milionë euro”. 

Shqetësim zonja Xhisho shprehur edhe për 195 milionë euro që sipas saj do të shkojnë për zbatimin e vendimeve të gjykatave ndërkombëtare, detyrime që kanë ardhur si pasojë e keqqeverisjes. 

“Fatkeqësisht, ky është buxheti që do t’i zhysë shqiptarët akoma më thellë në krizë, do të nxisë akoma më tej shpopullimin e do të vijojë të mbushë xhepat e klientëve të qeverisë” tha nënkryetarja e Partisë së Lirisë, Erisa Xhixho.