Zaçaj kërkon qëndrimin në krye të Kushtetueses, Gjykata e Lartë çel procedurat për zëvendësimin e saj
Kryetari i Gjykatës së Lartë, Sokol Sadushi hapi sot procedurën për zgjedhjen nga Gjykata e Lartë të anëtarit të ri të Gjykatës Kushtetuese me mandat të plotë 9-vjeçar.
Vendimi i Gjykatës së Lartë vjen pas deklaratave të djeshme të kryetares së Gjykatës Kushtetuese, Holta Zaçaj, e cila u shpreh se 10 marsi 2025 nuk është datë e përcaktuar për përfundimin e mandatit të saj si anëtare e Gjykatës Kushtetuese. Ndaj në lidhje me këtë çështje, Zaçaj u shpreh se do t’i drejtohet Komisionit të Venecias për një opinion zyrtar.
Ndërkohë në vendimin e sotëm, Gjykata e Lartë shprehet se koha e përfundimit të mandatit të gjyqtarit zëvendësues në mars 2025 është bërë publike në njoftimet e kryera nga Gjykata e Lartë për hapjen e procedurës së aplikimit për zgjedhjen e anëtarit të Gjykatës Kushtetuese.
Bazuar në këto njoftime, Gjykata e Lartë shprehet se “të gjithë kandidatët që kanë aplikuar për këtë vend vakant janë informuar për kohëzgjatjen e mandatit”.
Nisur nga fakti se Gjykata Kushtetuese nuk ka përmbushur detyrimin e deklarimit të mbarimit të mandatit të Holta Zaçajt, Gjykata e Lartë, si organ emërtues i ngarkuar nga Kushtetuta, ushtron kompetencën ekskluzive për zgjedhjen e anëtarit të Gjykatës Kushtetuese, pa u penguar nga asnjë organ tjetër kushtetues.
Po ashtu, ligji “Për organizimin dhe funksionimin e Gjykatës së Lartë të Republikës së Shqipërisë” detyron kryetarin e kësaj gjykate të përmbushë detyrën e tij funksionale për të hapur procedurat për pranimin brenda 30 ditëve të aplikimeve për anëtar të Gjykatës Kushtetuese.
“Koha e përfundimit në mars 2025 të mandatit të gjyqtarit zëvendësues Holta Zaçaj është e bazuar në Kushtetutë në të gjithë procedurën ligjore që është ndjekur nga njoftimet për hapjen e procedurës së aplikimit”, thuhet në njoftim.
