Zelensky konfirmon përleshjet vdekjeprurëse me trupat e Koresë së Veriut

Trupat e Koresë së Veriut të dislokuara në rajonin Kursk të Rusisë kanë luftuar forcat e Kievit në fushën e betejës. Lajmi është bërë me dije nga presidenti ukrainas Volodymyr Zelensky, duke shtuar se përleshjet rezultuan me vdekje.

Zelensky tha se 11,000 ushtarë të Koresë së Veriut janë në rajon, ku inkursioni ushtarak tre-mujor i Ukrainës në territorin rus ka ngecur.

“Njëmbëdhjetë mijë ushtarë të Koresë së Veriut ose ushtarë të ushtrisë së Koresë së Veriut janë aktualisht të pranishëm në territorin e Federatës Ruse në kufirin me Ukrainën në veri të vendit tonë në rajonin e Kurskut”, tha Zelensky në samitin e Komunitetit Politik Evropian në Budapest, Hungari.

Një numër i trupave të Koresë së Veriut janë vrarë në një angazhim të kufizuar me forcat ruse dhe ukrainase.

Njoftimi i përdorimit të tyre në luftime vjen ndërsa Shtetet e Bashkuara dhe aleatët e saj peshojnë se si t’i përgjigjen partneritetit ushtarak në rritje midis Moskës dhe Phenianit.

Ukraina dhe aleatët e saj në NATO po vlerësojnë gjithashtu se si rizgjedhja e Donald Trump si President i SHBA, do të ndikojë në balancën e luftës dhe po përgatiten për mundësinë e një reduktimi dramatik të mbështetjes amerikane dy vite e gjysmë pas pushtimit të Moskës.

Të enjten, presidenti rus Vladimir Putin bëri komentet e tij të para publike për zgjedhjet amerikane, duke thënë se ai është gati për dialog me presidentin e zgjedhur republikan dhe vuri në dukje se komentet e Trump për përfundimin e luftës së Rusisë në Ukrainë “meritojnë të paktën vëmendjen”.