Zgjedhjet 2025, SPAK hap faqen për denoncimin e krimeve elektorale gjatë fushatës

5 vite nga krijimi i tyre, Gjykata kundër Korrupsionit dhe Krimit të Organizuar dhe Struktura e Posaçme Antikorrupsion po i japin një vëmendje të veçantë edhe krimeve zgjedhore.

SPAK-u ka hapur edhe një linjë të posaçme në faqen e vet zyrtare, ku fton qytetarët që të denoncojnë krimet zgjedhore.

Pasi klikon “Denonco krimin zgjedhor”, shkruhet emri dhe mbiemri, numri i telefonit dhe qendra e banimit, të dhëna që i shikon vetëm SPAK-u.

Në vijim duhet të klikosh nëse po denoncon një grup kriminal apo organizatë të përfshirë në krim zgjedhor dhe jo vetëm.

Por aty mund të vendosen edhe informacione në kategorinë e zyrtarëve më të lartë, që mund të denoncohen nëse ka informacione, prova dhe indicie, nga kupola e shtetit dhe deri tek zyrtari më i thjeshtë. 

Po ashtu pranë kategorisë së zyrtarëve gjendet edhe krimi që po denonconi, ku përfshihet përpos korrupsionit edhe përdorimi i funksionit publik për veprimtari politike ose zgjedhore. 

SPAK-u thotë se janë 16 vepra penale të cilat mund të denoncohen në këtë platformë në internet, ku mund të bashkëngjiten foto dhe video që qytetarët mund të disponojnë.

Prokuroria e posaçme fton qytetarët, subjektet juridike apo fizike, sikurse edhe OJF-të, që të bashkëpunojnë me denoncime dhe referime rastesh të dyshuara apo me prova.

SPAK-u vë në dispozicion edhe një e-mail, i cili vlen edhe për disaporën.

Për të evidentuar ndërhyrjen e zyrtarëve të lartë shtetërorë në zgjedhjet parlamentare të 11 majit, si dhe botës së krimit, Struktura e Posaçme Antikorrupsion, Prokuroria e Përgjithshme dhe Komisioni Qendror i Zgjedhjeve kanë bërë një marrëveshje të posaçme me qëllim evidentimin e rasteve dhe ndjekjen e tyre penale.