Zgjedhjet e 11 majit, Celibashi: Partitë politike, pjesë e ekipit që do të numërojnë votën e diasporës

Kreu i Komisioni Qendror të Zgjedhjeve, Ilirjan Celibashi në një komunikim me gazetarët rreth 4 muaj para zgjedhjeve të përgjithshme parlamentare të 11 majit, deklaroi se do i kërkojë qeverisë nëpërmjet një akti normativ, zgjatjen e vlefshmërinë së dokumenteve të identifikimit për shtetasit shqiptarë që jetojnë jashtë vendit.

Po ashtu, ndërsa foli për Kodin Zgjedhor, Celibashi u shpreh se do i drejtohet Kuvendit me një kërkesë për të ndryshuar strukturën e cila do të merret me vlerësimin dhe numërimin e votave të diasporës.

Ai theksoi se numërimi dhe vlerësimi i fletëve të votimit do të bëhet nga një komision i përbërë në gjysmën e tij nga përfaqësues të opozitës dhe në gjysmën tjetër nga përfaqësues të pozitës. Celibashi shtoi se, do të jetë dhe një sekretar teknik i caktuar nga KQZ pa të drejtë vote.

“Numërimi dhe vlerësimi i fletëve të votimit do të bëhet nga një komision i përbërë në gjysmën e tij nga përfaqësues të opozitës dhe në gjysmën tjetër përfaqësues të pozitës. Dhe do jetë një sekretar teknik i caktuar nga KQZ pa të drejtë vote. Do jetë 2 me 2 ose 3 me 3, në përbërje ky komision.

Po kështu, në këtë mënyrë do jetë dhe përbërja e grupeve të numërimit, do përbëhen në mënyrë të balancuar nga përfaqësues të opozitës dhe të pozitës. Procesi i numërimit do zhvillohet në një ambient sikurse zhvillohet dhe numërimi i fletëve të votimit brenda vendit.

Jo domosdoshmërisht do jenë ambientet e KQZ, por një ambient që ofron nga pikëpamja teknike edhe hapësirës mundësi për ta zhvilluar në mënyrë të hapur, transparente procesin e numërimit”, u shpreh Celibashi.