Zgjedhjet e 11 majit, KQZ dërgon 16 kandidatë për verifikim në prokurori

Komisioni Qendror i Zgjedhjeve ka miratuar vendimin për të dërguar për verifikim në Prokurorinë e Përgjithshme, 16 kandidatë për deputetë për zgjedhjet e 11 majit.

Kjo procedurë ndiqet në kuadër të ligjit të dekriminalizimit.

“Dërgimi pranë zyrës së Prokurorit të Përgjithshëm i këtyre rasteve për një verifikim të thelluar jodomosdoshmërisht presuzopon që ndonjëri prej tyre mund të jetë në kushtet e ndalimit, por në deklarimet që kanë bërë janë shkak ligjor për ne që të vijojmë me këtë procedurë,” u shpreh kryetari i KQZ-së, Ilirjan Celibashi.

Komisioni Zgjedhor gjithashtu votoi projektvendimin për prodhimin e rreth 250 mijë fletëve të votimit për shqiptarët nga diaspora, vota e të cilëve do numërohet tek Parku Olimpik në Tiranë.

“Duke filluar nga data 5 prill do të jetë në gatishmëri të plotë teknike për të kryer më së pari procesin e përgatitjes së dokumentacionit zgjedhor dhe dërgimin e këtij dokumentacioni tek votuesit jashtë territorit të Republikës së Shqipërisë,” tha z. Celibashi.

Italia është shteti që kryeson me regjistrimet nga e votuesve nga jashtë, konkretisht 91.210 zgjedhës, ndjekur nga Greqia me 68.292 zgjedhës, Gjermania me 25.491 zgjedhës, SHBA-ja me 20.669 zgjedhës dhe Britania e Madhe me 17.583 zgjedhës nga diaspora shqiptare.