Zgjedhjet e 11 majit- Në KQZ kanë mbërritur mbi 22 mijë zarfe me votat e diaporës

Për herë të parë në historinë e vendit, emigrantët po votojnë nga vendi ku jetojnë për parlamentaret e 11 majit. Komisioni Qendror i Zgjedhjeve ka përfunduar procesin e dërgimit të zarfeve me fletët e votimit për shqiptarët që jetojnë jashtë vendit. Sipas shifrave zyrtare të publikuara nga KQZ, deri sot janë marrë nga zgjedhësit 164 022 zarfe, ndërsa 22 534 kanë mbërritur në KQZ. 

Deri tani kanë mbërritur më shume zarfe nga Italia 6.8%, Gjermania 1.5% Mbretëria e Bashkuar 1.0%, Shtetet e Bashkuara te Amerikës 0.7% dhe Greqis 0.7%. Zarfe të mbërritura sipas qarqeve, vendin e pare e zë Durrësi me 3.6%, më pas Elbasani me 1.8%, Berat me 1.4%, Dibra me 1.3%, Tirana me 1.2% dhe Lezha me 0.8%. 

Votuesit në diasporë kanë kohë ta plotësojnë dhe ta dërgojnë fletën e votimit me postë deri në javën e parë të muajit maj. Çdo votë që mbërrin në Shqipëri pas datës 11 maj, ora 19:00, do të konsiderohet e pavlefshme. Vendi i caktuar për administrimin e këtij procesi është Pallati i Sportit “Feti Borova”, pranë Parkut Olimpik Tiranë dhe po aty do të kryhet numërimi i votave të diasporës. Zarfet po monitorohen 24 orë nga kamera të sigurisë, por dhe përfaqësues të partive politike.