Zgjidhet “Trajneri i vitit” në tenis, Djokovic: Çfarë duhet të bëjmë që të fitojmë?

Një rivalitet i ri ka lindur në botën e tenisit, ai mes numrit një në renditjen botërore Novak Djokovic dhe italianit Jannik Sinner, që është ngjitur në vendin e katërt në renditjen ATP. Serbi mposhti Sinner në finalen e “Nitto Atp Finals”, por italiani mori menjëherë hak, duke fituar Kupën Davis ( ku mposhti në finale Australinë, por më herët Italia eliminoi Serbinë e Noles).

Falë performancave shumë të mira të këtij viti, tenisti italian është vlerësuar me dy çmime të rëndësishme në këtë fund viti. Sinner u zgjodh lojtari më i dashur nga tifozët e tenisit në të gjithë botën, ndërsa dy trajnerët e tij Simone Vagnozzi dhe Darren Cahill fituan çmimin ATP “Trajneri i vitit”.

Vetëm në vendin e katërt u rendit Goran Ivanisevic, trajneri i Djokovic. Kjo që nuk i ka pëlqyer aspak tenistit serb, që në një shkrim në rrjetet sociale, pasi ka përgëzuar trajnerët e Sinnerit për çmimin e marrë, ka përdorur ironinë për të “ngushëlluar” trajnerin e tij.

“Goran, mendoj që duhet të fitojmë të katërta Grand Slamet, që ti (ndoshta) të mund të fitosh çmimin trajneri i vitit. E mbyllëm vitin në vendin e parë në renditje, fituam 3 Grand Slam, shumë turne të tjerë. Të shkruash historinë e këtij sporti nuk është e mjaftueshme, trajneri im i dashur”, shkruan Djokovic.