Zhbllokohet segmenti Bogë-Theth/Disa zona të thella vazhdojnë pa energji elektrike

Reshjet e dendura të borës nuk kanë ndalur gjatë mbrëmjes së djeshme në Qarkun e Shkodrës, sidomos në Bashkinë Shkodër. Fatmirësisht të gjitha akset nacionale janë të hapura, por situata ka qenë kritike në zonat e thella malore, ku është ndërprerë energjia elektrike. Autoritetet kanë bërë të mundur zhbllokimin e rrugës Bogë-Theth nga bora, duke e bërë atë të aksesueshme, por këshillohet përdorimi i zinxhirëve dhe gomave dimërore. Në aksin rrugor Bogë-Qafë Thore ka rreth 20 cm rreshje dëbore por rruga është e kalueshme.Në territorin e bashkisë Malësi e Madhe nuk raportohen probleme me përjashtim të energjisë elektrike. Në njësinë administrative Kastrat dhe në fshatin Vermosh ka patur ndërprerje të energjisë elektrike. Në bashkinë Pukë nuk raportohen probleme, ndërsa në atë Fushë Arrëz vijojnë reshjet e dëborës me intensitet të lartë dhe trashësia e borës arrin rreth 20 cm.Rrugët janë të kalueshme me vështirësi për shkak të prezencës së dëborës dhe ngricave. Përmes një postimi në rrjetin social “Facebook”, ARRSH thekson se është e domosdoshme që drejtuesit e mjeteve të pajisen me goma dimërore dhe zinxhirë kur udhëtojnë për në segmentet me prezencë dëbore, të ulin shpejtësinë, të respektojnë sinjalistikën dhe udhëzimet e Policisë Rrugore.