Zvogëlimi i pranisë së Policisë në 3 komunat në veri, Kurti: Situata më e qetë, …

Zvogëlimi i pranisë së Policisë në 3 komunat në veri, Kurti: Situata më e qetë, vigjilent për ri-eskalim nga Serbia

Pas zvogëlimit me 25 % të pranisë së Policisë së Kosovës në tri ndërtesat e komunave në veri, Kryeministri Albin Kurti ka deklaruar se nuk do të ketë zvogëlim të menjëhershëm, por gradual të prezencës së efektivëve pranë objekteve komunale.

Kurti sqaroi se zvogëlimi i pranisë së Policisë vlen vetëm për 3 komunat, jo për veriun e vendin, që sikurse tha ai, ka ende punë e sfida për sundim të plotë të rendit e ligjit.

“Ashtu qysh kemi thënë para më shumë se dy muajve: 1) nuk do të ketë zvogëlim të përnjëhershëm dhe as të menjëhershëm të pranisë së policisë, por vetëm gradual e proporcional; 2) zvogëlimi vlen për praninë policore në ndërtesat komunale dhe rrethinat e tyre, e jo për veriun e vendit, ku ka ende sfida e punë për sundim të plotë të rendit e ligjit”, tha Kurti.

Kryeministri u shpreh se Kosova po zbaton me përgjegjësi e seriozitet marrëveshjen e Bratislavës. Kurti theksoi se Kosova mbetet vigjilente për ri-eskalim që mund të nxitet nga deklaratat urrejtje dhe agresiviteti politik e shtetëror nga Serbia.

“Ne po zbatojmë me përgjegjësi dhe seriozitet, sinqeritet dhe kujdes, marrëveshjen e Bratisllavës nga 10 korriku 2023 në funksion të kërkesave të BE-së nga 3 qershori 2023 për de-eskalim. Konstatimi i përbashkët me faktorët ndërkombëtarë për përmirësimin e dukshëm të nivelit të paqes dhe sigurisë në veri dëshmon për de-eskalim të qartë. Njëkohësisht, ne jemi vigjilent për ri-eskalimin potencial që mund të vijë nga deklaratat që nxisin urrejtje dhe agresiviteti politik e shtetëror i fqinjit tonë verior”, u shpreh ai.

Burimi