Zyrtare: Suarez bashkohet me Messin tek Inter Miami
Suarez
Tashmë është zyrtare: Luis Suarez është lojtari më i ri i Inter Miamit në kampionatin amerikan të futbollit (MLS). Sulmuesi uruguaian do të bashkohet me tre ish-shokët e skuadrës me të cilët ka luajtur te Barcelona Lionel Messi, Sergio Busquets dhe Jordi Alba.
Ditën e sotme Suarez udhëtoi drejt Shteteve të Bashkuara të Amerikës dhe pasdite ka ardhur edhe zyrtarizimi i blerjes së tij nga Inter Miami në kanalet zyrtare të klubit.
Sulmuesi ishte një lojtar i lirë, pasi i kishte skaduar kontrata me Gremion dhe firmosi për një sezon me klubin amerikan. 36-vjeçari nuk e ka harruar vesin e golit, pasi në sezonin e fundit me brazilianët e Gremios arriti që të shënojë 26 gola. Suarez do të nisë një kapitull të ri në karrierën e tij të pasur tashmë në MLS me fanellën e Inter Miamit.
